ലേണേഴ്സ് ലൈസന്സ് ടെസ്റ്റ് മാതൃകാ ചോദ്യ പേപ്പറും ഉത്തരങ്ങളും

കേരള ലേണേഴ്സ് ടെസ്റ്റ് 2026: എളുപ്പത്തിൽ പാസാകാൻ ഈ ചോദ്യങ്ങൾ പഠിക്കാം - ഭാഗം 1

​സ്വന്തമായി ഒരു ഡ്രൈവിംഗ് ലൈസൻസ് എന്നത് മിക്കവരുടെയും വലിയൊരു സ്വപ്നമാണ്. എന്നാൽ അതിലേക്കുള്ള ആദ്യ പടിയായ ലേണേഴ്സ് ടെസ്റ്റിനെ (Learner's Test) ഭയത്തോടെയാണോ നിങ്ങൾ കാണുന്നത്? കമ്പ്യൂട്ടർ അധിഷ്ഠിതമായി നടത്തുന്ന ഈ പരീക്ഷയിൽ എന്ത് ചോദിക്കും, എവിടെ നിന്ന് പഠിക്കണം എന്നതിനെക്കുറിച്ച് പലർക്കും വലിയ ആശങ്കയുണ്ടാകാറുണ്ട്.

​എന്നാൽ ഒട്ടും പേടിക്കേണ്ട! മോട്ടോർ വാഹന വകുപ്പിന്റെ (MVD Kerala) ട്രാഫിക് നിയമങ്ങളെക്കുറിച്ചും റോഡ് സുരക്ഷയെക്കുറിച്ചും അടിസ്ഥാനപരമായ അറിവുണ്ടെങ്കിൽ വളരെ എളുപ്പത്തിൽ നിങ്ങൾക്ക് ഈ കടമ്പ കടക്കാം.

​2026-ലെ കേരള ലേണേഴ്‌സ് ടെസ്റ്റിന് തയ്യാറെടുക്കുന്നവർക്കായി, പരീക്ഷയിൽ സ്ഥിരമായി ചോദിക്കുന്നതും നിർബന്ധമായും അറിഞ്ഞിരിക്കേണ്ടതുമായ ഏറ്റവും പ്രധാനപ്പെട്ട ചോദ്യങ്ങളും ഉത്തരങ്ങളും താഴെ നൽകുന്നു.

​1. അടിസ്ഥാന ഡ്രൈവിംഗ് നിയമങ്ങൾ

​ചോദ്യം: ഡ്രൈവർ റോഡിന്റെ ഏതുവശം ചേർന്ന് വാഹനം ഓടിക്കണം? 

ഉത്തരം: ഇടത് വശം ചേർന്ന്.

​ചോദ്യം: ഒരു വാഹനത്തിന്റെ ഡ്രൈവർ എതിർദിശയിൽ നിന്ന് വരുന്ന വാഹനങ്ങളെ ഏത് വശത്തുകൂടി കടന്നുപോകുവാൻ അനുവദിക്കണം?

ഉത്തരം: വലത് വശം.

​ചോദ്യം: ഒരു റോഡിൽ കൂടി ഓടിക്കൊണ്ടിരിക്കുന്ന വാഹനം ഇടതുവശത്തേക്കുള്ള റോഡിലേക്ക് തിരിഞ്ഞ് കയറേണ്ടത് എങ്ങനെ? 

ഉത്തരം: റോഡിന്റെ ഇടത് വശം ചേർന്ന്.

​ചോദ്യം: കാൽനടയാത്രക്കാർ സീബ്രാ ക്രോസിങ്ങിലൂടെ റോഡ് മുറിച്ച് കടക്കാൻ ശ്രമിക്കുമ്പോൾ വാഹനം ഓടിക്കുന്ന ഡ്രൈവർ അനുവർത്തിക്കേണ്ട നിയമങ്ങൾ എന്തെല്ലാം? 

ഉത്തരം: കാൽനടയാത്രക്കാർക്ക് മുൻഗണന നൽകി വാഹനം നിർത്തി കൊടുക്കണം.

​ചോദ്യം: ഒരു വാഹനത്തിന്റെ ഡ്രൈവർ വൺ-വേ (One-way) നിയന്ത്രണമുള്ള റോഡിൽ പാലിക്കേണ്ട നിയമങ്ങൾ എന്തെല്ലാം? 

ഉത്തരം: വാഹനം പുറകോട്ട് (Reverse) ഓടിക്കരുത്.

​2. ഓവർടേക്കിങ് (Overtaking) നിയമങ്ങൾ

​ചോദ്യം: മുന്നിൽ പോകുന്ന വാഹനത്തെ ഓവർടേക്ക് ചെയ്യാൻ പാടില്ലാത്ത സാഹചര്യങ്ങൾ എന്തെല്ലാം? 

ഉത്തരം: ഇടുങ്ങിയ പാലം, വളവ്, തിരിവ്, ജംഗ്ഷൻ, മുൻവശം കാണാൻ പാടില്ലാത്ത കയറ്റം, മറ്റു വാഹനങ്ങൾ തന്റെ വാഹനത്തെ ഓവർടേക്ക് ചെയ്യാൻ തുടങ്ങിക്കഴിഞ്ഞാൽ, മുന്നിലെ വാഹനത്തിൽ നിന്ന് സിഗ്നൽ കിട്ടിയില്ലെങ്കിൽ.

​ചോദ്യം: ഓവർടേക്കിങ് നിരോധിച്ചിട്ടുള്ള സ്ഥലങ്ങൾ ഏതെല്ലാം? 

ഉത്തരം: ജംഗ്ഷനുകളിൽ.

​ചോദ്യം: മുന്നിൽ പോകുന്ന വാഹനത്തെ ഓവർടേക്ക് ചെയ്യുമ്പോൾ പാലിക്കേണ്ട നിയമങ്ങൾ എന്തെല്ലാം? 

ഉത്തരം: മുന്നിലെ വാഹനത്തിന്റെ ഡ്രൈവറിൽ നിന്നും ഓവർടേക്ക് ചെയ്യാനുള്ള സിഗ്നൽ കിട്ടിയ ശേഷം മാത്രം.

​

ചോദ്യം: തന്റെ വാഹനത്തെ മറ്റൊരു വാഹനം ഓവർടേക്ക് ചെയ്യുമ്പോൾ പാലിക്കേണ്ട നിയമങ്ങൾ എന്തെല്ലാം?

ഉത്തരം: വേഗത കുറച്ച് ഇടത്തുവശത്തേക്ക് മാറി സുഗമമായി കടന്നുപോവാൻ അനുവദിക്കണം.

​ചോദ്യം: മുന്നിൽ പോകുന്ന വാഹനത്തിന്റെ ഇടതുവശത്തുകൂടി മറികടക്കുന്നത് എപ്പോഴെല്ലാമാണ്? 

ഉത്തരം: വലത്തുവശത്തേക്ക് തിരിയുന്ന വാഹനം സിഗ്നൽ കാണിച്ച് റോഡിന്റെ മധ്യഭാഗത്ത് എത്തുമ്പോൾ.

​3. ജംഗ്ഷനുകളിലെയും റോഡുകളിലെയും നിയമങ്ങൾ

​ചോദ്യം: ഒരു ജംഗ്ഷനിൽ എത്തുമ്പോൾ ഡ്രൈവർ അനുവർത്തിക്കേണ്ടത് എന്തെല്ലാം? 

ഉത്തരം: വേഗത കുറയ്ക്കണം. പ്രധാന റോഡുകൾ കൂടിച്ചേരുമ്പോൾ വലതുവശത്തു നിന്ന് വരുന്ന വാഹനങ്ങളെ ആദ്യം കടത്തിവിടണം. ശാഖാ റോഡിൽ നിന്ന് പ്രധാന റോഡിലെ എല്ലാ വാഹനങ്ങളും കടന്നുപോയശേഷം മാത്രം മുന്നോട്ട് പോകുക.

​ചോദ്യം: ശാഖാ റോഡിൽ നിന്ന് പ്രധാന റോഡിലേക്ക് പ്രവേശിക്കുമ്പോൾ ഡ്രൈവർ പാലിക്കേണ്ട തത്ത്വങ്ങൾ എന്തെല്ലാം?

ഉത്തരം: വേഗത കുറയ്ക്കണം, പ്രധാന റോഡിലെ എല്ലാ വാഹനങ്ങളും കടന്നുപോയശേഷം വാഹനം മുന്നോട്ട് എടുക്കാവുന്നതാണ്.

​ചോദ്യം: ട്രാഫിക്ക് പോലീസോ, സിഗ്നലോ ഇല്ലാത്ത രണ്ട് പ്രധാന റോഡുകൾ യോജിക്കുന്ന ജംഗ്ഷനിൽ എത്തുമ്പോൾ ഏത് വാഹനങ്ങൾക്ക് മുൻഗണന കൊടുക്കും? 

ഉത്തരം: വലതുഭാഗത്തു നിന്നു വരുന്ന വാഹനത്തിന്.

​ചോദ്യം: റോഡിനു നടുവിൽ തുടർച്ചയായി മഞ്ഞവര ഇട്ടിരിക്കുന്നതിന്റെ ഉദ്ദേശം എന്തെല്ലാം? 

ഉത്തരം: ആ മഞ്ഞവര തൊടാനോ മുറിച്ച് കടക്കാനോ പാടില്ല.

​ചോദ്യം: നിങ്ങൾ ഓടിക്കുന്ന വാഹനം ഇടുങ്ങിയ പാലത്തെ സമീപിക്കുമ്പോൾ എതിർ ദിശയിൽ മറ്റൊരു വാഹനം പാലത്തിനടുത്ത് എത്തിയാൽ എങ്ങനെ കടന്നു പോകും? 

ഉത്തരം: വാഹനം നിർത്തി എതിരെ വരുന്ന വാഹനം കടന്നു പോയശേഷം മാത്രം യാത്ര തുടരുക.

​ചോദ്യം: ഒരു റോഡിൽ കൂടി ഓടിക്കൊണ്ടിരിക്കുന്ന വാഹനം വലതുവശത്തേക്കുള്ള റോഡിലേക്ക് തിരിഞ്ഞ് കയറേണ്ടത് എങ്ങനെ? 

ഉത്തരം: വലതുവശത്തേക്ക് സിഗ്നൽ കാണിച്ച് റോഡിന്റെ മധ്യഭാഗത്തുകൂടി, പ്രവേശിക്കുന്ന റോഡിന്റെ ഇടതുവശത്തേക്ക് കയറണം.

​4. യു ടേൺ (U-Turn) നിയമങ്ങൾ

​ചോദ്യം: 'U' ടേൺ തിരിയുവാൻ പാടില്ലാത്ത സാഹചര്യങ്ങൾ എന്തെല്ലാം? 

ഉത്തരം: തിരക്കുള്ള റോഡുകളിൽ യു ടേൺ എടുക്കരുത്. അതുപോലെ നിരോധിച്ചിട്ടുള്ള സ്ഥലങ്ങൾ, തുടർച്ചയായി ഒറ്റവരയോ ഇരട്ട വരയോ ഉള്ള സ്ഥലങ്ങൾ, മേജർ റോഡുകൾ, ഹൈവേകൾ, എക്സ്പ്രസ് ഹൈവേകൾ എന്നിവടങ്ങളിലും പാടില്ല. വാഹനത്തിന് ചുറ്റുവട്ടത്ത് ഏതെങ്കിലും ബ്ലൈൻഡ് സ്പോട്ടുകൾ ഉണ്ടെങ്കിലും U Turn എടുക്കരുത്.

​ചോദ്യം: 'U' ടേൺ തിരിയുന്ന സ്ഥലങ്ങൾ ഏതെല്ലാം? 

ഉത്തരം: അനുവദിച്ചിട്ടുള്ള സ്ഥലങ്ങൾ, നിയന്ത്രണം ഏർപ്പെടുത്താത്ത തിരക്കില്ലാത്ത സ്ഥലങ്ങൾ. അനുവദിച്ച സ്ഥലങ്ങളിൽ മാത്രം വലിയ വാഹനങ്ങൾക്ക് ഇടതു ലൈനിൽ നിന്ന് U Turn എടുക്കാവുന്നതാണ്.

​ചോദ്യം: 'U' ടേൺ തിരിയുമ്പോൾ പാലിക്കേണ്ട നിയമങ്ങൾ എന്തെല്ലാം?

ഉത്തരം: റിയർവ്യൂ മിററിൽ നോക്കി പിന്നിൽ നിന്നും വാഹനം വരുന്നില്ലെന്ന് ഉറപ്പുവരുത്തി, വലതു വശത്തേക്ക് സിഗ്നൽ നൽകി എതിർ ദിശയിൽ നിന്ന് വരുന്ന വാഹനങ്ങളെ തടസ്സപ്പെടുത്താതെ തിരിയുക.

​ഈ പോസ്റ്റിന്റെ രണ്ടാം ഭാഗത്തിൽ ട്രാഫിക് സൈനുകൾ, ശിക്ഷകൾ, വാഹന രേഖകൾ എന്നിവയെക്കുറിച്ചുള്ള പ്രധാന ചോദ്യങ്ങളും ഒരു ഓൺലൈൻ മോക്ക് ടെസ്റ്റും ഉൾപ്പെടുത്തിയിട്ടുണ്ട്.

👉 രണ്ടാം ഭാഗം വായിക്കാൻ ഇവിടെ ക്ലിക്ക് ചെയ്യുക